http://altai.kurultai.ru
Јарлу якут јондык ишчиниҥ Шамаев Иван Ивановичтиҥ Туулу Алтайла јол-јорыгы тӱгенип, јерине јанды Якут И. Шамаев бистиҥ Алтайла јол-јорыгын тӱгезип, јерине јанды. Иван Иванович бойыныҥ билезиле Белокуриха курортто амыралтада болгон. Је кажы ла амыраар кӱндерде бистиҥ Алтайла бойыныҥ акчазыла јорыктап, улусла, ӱредӱчилерле тушташкан. Оны јилбиркеткен эҥ учурлу сурак - алтайлар бойыныҥ тилин канай билер, онон ары алтайлардыҥ тилиниҥ салымы.
Бу ӧткӧн амыраар кӱндерде ол Улалуда алтай тилдиҥ сурактарыла оорыган улусла тушташкан. Бу туштажуга јарлу алтай бичиичи Ј. Каинчин, 7-чи номерлӱ школдыҥ ӱредӱчилери, Кандаракова Е.П., Кыпчаков В.К., Демчинова М.А., Т.Д. ла Н.Е. Мендиндер, Алушкин П.М., Сураков С.А. болдылар. Национальный гимназияныҥ директоры А. Марков ло завучы О. Ляшко аҥылу кычыруны алганда болзо, бойлоры да келбеди, ӱредӱчилерди де аткарбады. Туштажуда јуулган улус национал гимназияныҥ там ла там алтай тоомјызы јылыйып браатканын темдектедилер. Ӱредӱчилердиҥ билгирин бийиктедер институттыҥ ректоры В. Модорова база кемди де туштажуга аткарбады. "Алтайдыҥ Чолмоны" газеттиҥ редакторыныҥ ордынчызы А. Сельбиков аткарган корреспондент база келбеди. Иван Иванович якуттарда јылдыҥ ла якут тилле 1-4 класстарда балдарын ончо предметтерле, 5-11 класстарда физиканы ла математиканы якут тилле ӱретсин деп некеген якут ада-энелер кӧптӧп турганын айтты. Ол туштажу керегинде бис келер кӱндерде бичиирис. Оноҥ И.И. Мӧндӱр-Соккондӧн Шодоев Н.А.-ле јолыгарга таксиге отурып, атанды. Мӧндӱр-Соккондо ол Шодоевле, ӱредӱчилерле јолыкты. Бӱгӱн ол јанды. |
