Оҕолорун төрөөбүт тылынан үөрэтиэхтэрин баҕарар Дьокуускай куорат төрөппүттэрин маҥнайгы мунньаҕа муус устар 15 күнүгэр буолан ааспыта. Бу кэпсэтиигэ оҕолорун Дьокуускай национальнай гимназиятыгар, «Айыы Кыһатыгар», Саха гимназиятыгар кыайан киллэрбэтэх төрөппүттэр мустубуттара уонна куорат атын оскуолаларыгар сахалыы кылаастары арыйтарары туруорсуохха диэн сүбэлэспиттэрэ. Муус устар 18 күнүгэр иккис мунньахха төрөппүттэр куорат үөрэҕириигэ салалтатыгар, 31 уонна 17 нүөмэрдээх оскуолаларга Дьокуускай национальнай гимназиятыгар сылдьан барытыгар аккаас ылан кэлбиттэрин кэпсээбиттэрэ.

Тосту уларыйыы нөҥүө күнүгэр тахсыбыта. Ити күн «Якутск вечерний» хаһыат «Прямой линия» оҤорбута (Бу түргэннэрин!). Манна Е.И. Евсикова: «31 оскуолаҕа саха кылааһа аһыллар, өссө 7-с, 23 оскуолаҕа барыаххытын эмиэ сҥп» диэбитин биир төрөппүт туоһулуур. Истэргэ үчүгэйин үчүгэй эрээри үөрэр эрдэ. Бу кэнниттэн муус устар 22, 23, 29 күннэригэр төрөппүт мунньаҕа буолан ааста. Бу тухары 31 оскуолаҕа суруйтарбыт, Е.И. Евсиковаҕа сайабылыанньа биэрбит төрөппүттэр «хас оҕо суруйтарбытын чып кистэлэҤҤэ туталлар, суруйтарбыт оҕолор испииһэктэрин көрдөрбөттөр» диэн кэпсээтилэр. Маннык бар-дьону бүдүмүккэ тута сылдьан төһө баҕарар араатардыахха сөп: «Биһиги саха кылааһын арыйа сатаабыппыт да баҕалаах төрөппүт аҕыйах!» - диэн. Оннук гыналлар даҕаны. Онон төрөппүттэр оскуолаҕа эбэтэр куорат үөрэҕин салалтатыгар биир-биир баран сайабылыанньа биэрэн кырдьыктарын булумматтарын курдук систиэмэ оҥоһуллубут быһыылаах.

Эбии сахалыы кылаастары арыйтарар наадатыгар төрөппүттэр түмсэн күргүөмүнэн туруорустахтарына эрэ кыайыахтара. Ол иһин төрөппүттэр түмсүүлэрэ сайабылыанньаны хомуйан, барытын холбуу илдьэн куорат үөрэҕин салалтатыгар илдьэн туттарарбыт сөп. Сайабылыанньа формата ilsakha.org саайтка баар. Иккиһинэн, саха кылааһын булбакка нуучча кылааһыгар суруйтарбыт төрөппүттэр эмиэ иккистээн сайабылыанньа биэрэллэрэ буоллар, кэлин сорох нууччалыы кылаастары сахалыы уларытар кыах үөскүө этэ.

Биһиги сибээстэһэр телефоннарбыт: 89142908764, 89644156392.

СОК пресс-киинэ